كيف تكتشف موهبتك الجزء الثانى
انا جمعت ليكم كل الاسئلة السابقه و مجموعه جديده لاكتشاف الموهبه و هم :
الاول : الوقت اللي كنت حاسس انك في افضل حالاتك امتي ؟ و كنت بتعمل ايه فيه ؟
التاني : ايه الحاجه اللي بتخليك مبسوط جدا و مش حاسس بالوقت و انت بتعملها ؟
التالت : احسن فتره عدت عليك في حياتك ؟
الرابع : ايه الانجاز اللى انت حققته في حياتك علي مستوي الشغل او الدراسه او حتي بينك و بين نفسك ؟
الخامس : ايه اكتر ماده كنت بتحبها في الدراسه بصرف النظر عن الدرجات ؟
السادس : ايه احسن مشروع او وظيفه اشتغلت فيها ؟ممكن تكون مشروع خيري او رحله مع اصحابك او مشروع معين في
الشغل …
السابع : ايه الحاجه اللي ماثره اوي فيك و عمرك ما نسيتها ؟
الثامن : لو افترضنا انت قاعد لوحدك في اجازه مدفوعه الاجر ،، ايه الحاجه اللي هتعملها تسلي نفسك و تريحك ؟
التاسع : ايه الحاجات اللي شايف نفسك متفوق فيها و بتعملها بسهوله ؟
العاشر : فكر في شخص ناجح و انت بتحبه و حدد ايه اللي بيعجبك في الشخص دا ؟ سماته او صفاته و لو في ليه مقوله
بيرددها ماثره فيك .
الحادي عشر : الناس شيفاك ازاي ، بتقول عنك ايه؟ ايه اللي بيميزك ، بيطلبوا مساعدتك في ايه باستمرار ؟
الثاني عشر : لو مفيش مشكله عندك في الفلوس ..ايه اول الحاجه تفكر تعملها ؟
الثالث عشر : اكتر برنامج بتحبه و بتابعه علطول ، او فيلم بتحبه و مش بتزهق منه ، او كتاب مسموع او بتقراه بتحبه اوي
، او مقالات ..
الرابع عشر :ايه الكورسات ، محاضرات …الخ.. انت اخدتها ؟
الخامس عشر : ايه اصعب قرار اخدته في حياتك
السادس عشر : في عادات غربيه بتمارسها ..ايه هي ؟
السابع عشر : لما كنت صغير ايه اكتر حاجه كنت بتحب تعملها ؟
الثامن عشر : الناس بتنتقدك في ايه ؟ ممكن الاهل او الاصحاب
التاسع عشر : ايه التجربه اللي مريت بيها و دايما تحكيها؟
العشرين : تخيل انك هتموت قريب …هتفكر في ايه هل هتغير حاجه في طريقه حياتك ؟ هل كان نفسك في حاجه تعملها
ولسه معملتهاش … راقب اجابتك.
الحادي والعشرين : ايه اللي بتعمله ببلاش من غير فلوس ؟ في حاجات بنعملها برا الشغل ببلاش و هي ممكن تكون بيزنس
و احنا مش واخدين بالنا لاننا متعودين علي عملها.
اقعد و ركز في اجاباتك ،، اكتب او سجل ،و لا تكتفي باجابه واحده و خد وقت لحد ماتوصل للاجابات اللي فعلا بتعبر عنك
و حاسس بيها اوي .
و في طرق كتير لاكتشاف الموهبه بس بالنسبه لغير المتخصصين الطريقه دي الانسب.
و لكن احنا كمدربين عندنا طرق تانيه ليها علاقه اكتر بالتحليل النفسي و تحليل الشخصيه و اكتشاف نوع الذكاء، و حاجات
متخصصه اكتر . فاذا مقدرتش توصل لحاجه من خلال العصف الذهنى ده ، مفيش مشكله لانك مش متخصص و ممكن
تكون بعدت عن شخصيتك الفطريه كتير ( احنا عندنا شخصتين ..شخصيه فطريه اللي رينا خلقنا بيها ، و شخصيه مكتسبه
بتكون نتيجه التجارب و الخبرات و التعليم )
المشاعر السلبيه و التجارب السابقه ممكن تخلينا نبعد عن شخصيتنا الفطريه و مش هتوصل للاجابات السليمه عن موهبتك ،
مفيش مشكله عادي جدا و اغلبنا كدا ..
ابعتلي و انا هبتدي اساعدك بالطرق التانيه التخصصيه اكتر .
اتفقنا ان في فرق بين المتخصص اللي يقدر يساعدك و بين انك تعمل الحاجه دي بنفسك فبالتالي لما اكون مش عارف لازم
اروح لمتخصص.
فيه حاجه اسمها معالجه العقل اللي بتختلف من شخص لاخر حتي لو المعلومات الداخله للعقل واحده و لكن المعالجه اللي بتم
داخل العقل بتختلف من شخص لاخر و بالتالي ادراكك و فهمك مختلف عن اى حد تانى
اختلافنا من عند ربنا و الا كان شخص واحد بس هو اللي فاهم و مفيش حد يشتغل و يكسب و مكنتش ترتاح اصلا في حياتك
ملاحظه للتاكيد علي موضوع البصمه الشخصيه للموهبه و معالجه العقل …
اوقات كدا مرت عليك في حياتك مع القربين منك و انت بتتكلم معاهم و ينصحوك بس انت مش بتنفذ كلامهم و بيكون من
جواك مستغرب شويه من كلامهم ، و بعد فتره تسمع النصيحه نفسها من شخص تاني و لكن تاثر فيك اكتر و كانك لاول
مره تسمعها، عارف دا بيحصل ليه ؟
علشان معالجه العقل ،، و ممكن تختلف من موضوع لاخر ، الشخص اللي اثرت معاك النصيحه بتاعته موهبته في الكلام
اللي قاله ليك. و لذلك بصمته واضحه و انت من الناس اللي يتسمع للشخص دا في الموضوع دا بالذات .
و علشان كدا مفيش حاجه احسن او اوحش في المطلق و لكن هي موضوع نسبي ممكن الكويس ليك يكون وحش لحد تاني و
لذلك لاتعتمد علي راي الغير لازم تجرب و تسمع بنفسك لان كل شخص مختلف عن الاخر .
ملحوظه : … مش لازم اللي انت بتحبه هو بالظبط موهبتك ،، هقولك مثال حصل معايا
( انا كنت من الناس اللي بتحب طرق التخسيس و الوصول للوزن المثالي و بالذات طريقه اللقيمات اللي وصي عليها سيدنا
محمد عليه الصلاه و السلام ، و كنت لسه في طريقي لاكتشاف موهبتي و لما وصلت ليها ان انا بحب التدريب النفسي و
تطوير الذات عرفت ايه اللي كان شاددني لريجيم اللقيمات ، لان الطريقه بتاعت الريجيم دا نفسيه و ليها علاقه بالتحكم
بالنفس و دا داخل في مجال موهبتي )
علشان كدا تتعمق اكتر جوه نفسك و تعمل عصف ذهني تقدر تتصل بنفسك و قلبك صح لحد ما عقلك يساعدك و توصل
بموهبتك .
و لكن اذا موصلتش ابعتلي و هساعدك بالطرق الاخري .
في المرات اللي جايه هنعرف ازاي نحول الموهبه دي لعمل بيزنس تكسب منه عمل حر خاص بيك و تكون عاش مرتاح
في ناس بتكون فاهمه انها طالما شاطره في شغلها و عارفه موهبتها خلاص بتكتفي بدا ،، للاسف دا مش كفايه انك تكون
عارف موهبتك مش كفايه علشان تعمل بيزنس لان اصلا انت مش عارف بيزنس .
علشان تضمن نجاح العمل الخاص بيك،،
لازم تكون عارف يعني ايه تسويق ، يعني ايه بيع ، نوع العميل ، فن الاقناع ، الرساله التسويقيه و حاجات تانيه كتير لازم
تعرفها قبل ما تبتدي لانه مش فهلوه.
بالنسبه ليا كمدربه نفسيه في حته خطيره جدا عايزه الفت نظركم ليها .. سيكلوجيه البيزنس .
يعني ايه .. البيع مش بس الدراسه النظريه و تطبيق الاساليب التسويق و البيع لكن في الاهم منه هو انت..
انت من جوه و ثقتك في نفسك و طريقتك بتكون عليها عامل كبير في نجاحك و دا بيوصل للاخرين جدا .
و انا بالنسبه ليا بشتغل اكتر علي الجانب النفسي ليك ازاي تحسن من اسلوبك علشان تقنع العميل و تتخلص من اي عراقيل
و معتقدات سلبيه او افكار سلبيه ممكن تكون واقفه امام البيع اللي انت بتعمله لان صدقني كل دا بيوصل للعميل بطريقه غير
مباشره و بتاثر علي بيعك و بالتالي علي نجاحك و استمرار عملك
.
في المرات اللي جايه هديكم فكره اكبر و ممكن نعمل وبينار ، ولو انتم عايزين حاجه ابعتلولي اعمل وبينار مجاني للحاجات
اللي محتاجنها .
تحياتي ليكم