كيف تكتشف موهبتك الجزء الاول؟
ازاي اقدر اعرف الموهبه بتاعتي ، يعني ممكن نقول الموهبه مع المهارات يديني نقاط القوه بتاعتي انا .
بنسميها كمان مجال الشغف ( الحاجه اللي بحبها اوي وبستمتع بيها ) لكن فيه ناس متعرفهاش خاصه ربات البيوت اللي هم
مشتغلوش في اي حاجه و محتكوش بناس كتير ، فمش هتقدر تتعرف على القدرات بتاعتها و هي شاطره في ايه .
المهم ازاي تقدر تكتشف موهبتك ..
ممكن اساعدكم بشويه اسئلة زي دايما اللي بيسال ابتدي منين ، انا عايز اعمل لنفسي حاجه بس مش عارف ابتدي منين ، او
انا مش عارف انا شاطر في ايه ، انا مش عارف الحاجه اللي بحبها ايه ، ايه هى الميزه بتاعتي .
تبتدي منين …من الحاجه اللي بتحبها و مستمتع بيها لان صعب اوي تعمل بيزنس في حاجه مش لاقي نفسك فيها لكن ممكن
مثلا تعمل موظف فتره تدخر منها مال علشان تبتدي الشغل اللي انت عايزه .
انما لو فكرت انك تعمل مشروع لمجرد ان دا الماشي و مطلوب اكتر وانت مش بتحبه غالبا هيفشل ، و دا حال معظم اللي
بيبتدي كدا . بس اللي هم مش فهمينه ان اللي بينجح بس اللي الشغف بتاعه هو البيزنس بتاعه ، العكس بيفشل لانك معرفتش
نفسك كويس ايه مهاراتك و قدراتك.
اول حاجه انك تعرف ايه اللي بتحبه ، و لازم يكون عندك قوه ملاحظه تراقب نفسك ايه الحاجه اللي بتعملها وانت مبسوط و
بسهوله ، و من كتر الاحتكاك و التكرار ممكن تتعرف علي نقاط القوه بتاعتك ، و كمان تبعد عن اللي مش بتحبه لانك مش
هتتميز فيه.
هساعدك بشويه اسئلة …
الاول : انت كنت شاطر في اي ماده في الدراسه ؟ بصرف النظر عن الدرجات لان مش شرط الدرجات تكون عاليه دليل
علي حبك للماده دي .
التاني : الناس بتقول ايه عنك؟ و دا مهم اوي ، لان الناس بتشوف حاجات فيك انت مش شايفها او مش حاسس بيها
ومعتبرها طبيعيه وعاديه ( اكتر حاجه انت بتعملها طبيعيه خالص هي دي غالبا الموهبه بتاعتك) انت شايفها سهله و عاديه
لان ربنا زرعها جواك فبتعملها بمنتهى السهوله ، و في ناس تانيه الموضوع دا صعب عليهم لانها مش جواهم ، و بالتالي
الناس بيشوفوا عندك اللي انت مش شايفه
من ضمن الحاجات اللي تسالها لنفسك علشان تعرف موهبتك .. ايه اكتر وقت كنت حاسس انك في افضل حالاتك ؟، كنت
في مود حلو اوي بتشتغل وانت رايق و مستمتع ، ممكن تعد قاعدة مع نفسك وتحاول تفتكر …
دي اشاره للموهبه بتاعتك اللي ربنا خلقك بيها و ميزك بيها .
كمان اسال نفسك ايه احسن حاجه فيك ؟
في ناس بتكون واخده بالها وعارفه هي شاطره في ايه و ممكن تكتب الحاجات دي هتساعدك تعرف موهبتك .
لكن اللي مش عارف في طرق تانيه هقولك عليها .
زي …ايه اكتر انجاز حققته في حياتك ؟
في شغلك ، مع اصحابك ،مع نفسك … اي كان امتي؟ و فين ؟…مهم انك تكتبها.
دلوقتي عايزين نكتب عن كل الاستفسارات دي في ورقه او سجلهم باي طريقه علشان دا هيساعدك كتير .ممكن تاخد وقت و
جاوب عن كل سوال كذا مره لحد ما كل الاجابات اللي في دماغك تظهر .
بالنسبه للي اشتغلوا في وظيفه قبل كدا ، اسالهم ايه اكتر وظيفه حبتها ،او احسن مشروع اشتغل فيه ؟
سوال كمان… ايه احسن فتره في حياتك ؟
و كمان … مين الشخص اللي بتعتبره قدوتك ؟ حد مشهور او شخص من اسرتك نفسك تكون زيه ، و فكر ايه اكتر حاجه
الشخص دا بيعملها بتحبها فيه ؟
و كمان … لو شيلنا مشكله الفلوس ،، بمعني نمنع العقل انه يفكر في مشكله الفلوس و يدور علي اي حل ..لا
احنا عايزين نتصل بالقلب و توصل للحاجه اللي فعلا بتحبها بعيدا عن المشكله الماديه .
تحب تعمل ايه بالفلوس اللي معاك؟
و كمان … ايه الحاجه اللي اهلك او الناس اللي حواليك شايفينك شاطر فيها و علطول بيطلبوها منك ؟
اكتر حاجه بتتكرر الناس بتطلبها منك حتي لو علي فترات بعيده من حياتك . حاول تفتكر…
كمان…. ايه اكتر حاجه انت بتحب تعملها ؟
و كل ما تفتكر حاجه تكتبها بدون عدد محدد ،، بس وجه عقلك و ركز… و عقلك هيساعدك مع الوقت و يفتح اجابات كتيره
ممكن اكتر من ميه ، المهم تعمل عصف ذهني و تاخد وقت تفكر.
عارفه …ممكن تحس ان الاجابات هتكون شبه بعض ، و ممكن تجاوب نفس الاجابات علي اسئلة مختلفه..مفيش مشكله لان
كل دا الهدف منه نعمل عصف ذهني و الاجابه ممكن تاخد اكتر من مره علشان تظهر بوضوح لان عقلك كل مره بتجاوب
فيها هينزل اجابات كتير ، و ممكن الصيغه اللي توصلك تختلف من شخص لاخر .
و نصيحتي ليك انك تجاوب علي كل الاسئلة اكتر من مره ؛ لان كل مرة هتلاقى اجابة مختلفة ، واعمق من اول اجابة
ايه الفرق بين الموهبه و الشغف ؟
بعيدا عن المصطلحات .. احنا هدفنا نوصل في الاخر للحاجه اللي بتعملها وانت مستمتع و مش حاسس بالوقت او التعب و
هو دا اللي ربنا زرعه جواك و ميزك عن باقي الخلق بيها و انت خليفه ربنا في الارض لما تشغل الفطره اللي عندك وتفيد
الناس بيها ، و تعملها وانت مرتاح و مستمتع و بطلاقه .
اكتب او سجل كل اللي بتفكر فيه دا هيساعدك توصل لموهبتك .
و في المره اللي جايه هنعرف ازاي تحول الموهبه لبيزنس
الجزء الثانى كيف تكتشف موهبتك؟